|
 Քանաքեռ-Զեյթուն
Բժշկական Կենտրոն ՓԲԸ-ն
հիմնադրվել է ՀՀ կառավարության 2003թ համապատասխան որոշմամբ՝ նախկին «8-րդ
բուժմիավորում» ՓԲԸ-ի բազայի վրա: ԲԿ-ն ներառում է
3 պոլիկլինիկա, որոնք սպասարկում են շուրջ 85 000 մեծահասակ և
մանկահասակ ազգաբնակչության: Կենտրոնի կազմի մեջ են մտնում նաև 17
բաժանմունքներ, 80 մահճակալանոց ծննդատունը, հիգիենայի և մասնագիտացված
հիվանդությունների գիտահետազոտական ինստիտուտը և ակնաբուժական պոլիկլինիկան:
Հիվանդանոցի մի շարք բաժանմունքներ հանդիսանում են Երևանի պետական համալսարանի
կլինիկական-ուսումնական բազա: Կենտրոնի կազմի մեջ է մտնում նաև ակնաբուժական
կոնսուլտատիվ պոլիկլինիկան, որտեղ իրականացվում է աչքի հիվանդությունների
ախտորոշում և բուժում ամբուլատոր պայմաններում: ԲԿ-ում աշխատում են 945
բուժաշխատողներ, որոնցից 334-ը բժիշկներ են, 400-ը՝ բուժքույրեր,
26-ը՝ գիտաշխատողներ, 44-ը վարչական աշխատողներ: 5-ը բժշկական
գիտությունների դոկտորներ են, 20-ը՝ բժշկական գիտությունների թեկնածուներ և
այլն:
Նյութատեխնիկական բազայի, դեղորայքով ապահովվածության, բժշկական կադրերի
մասնագիտական որակավորման մակարդակի բարձրացման, վարվելակերպի նորմերի անշեղ
պահպանման շնորհիվ վերջին տարիներին 1,5 անգամ ավելացել է «Քանաքեռ-Զեյթուն» ԲԿ-ի
բաժանմունքներում բուժվել ցանկացող հիվանդների թիվը՝ 4 000-ից հասնելով
6 000-ի:
Անցած 3 տարիների
ընթացքում, շնորհիվ տնօրինության ամենօրյա հետևողական աշխատանքի, շուրջ 2 անգամ
ավելացել են ԲԿ-ի եկամուտները, իսկ ընկերության բյուջեն աճել է՝ կազմելով ավելի քան
680 մլն դրամ:
Ժամանակակից
բժշկությունը ևս պահանջում է նոր տեղեկատվական տեխնոլոգիաների ներդրում: Այդ
նպատակով բժշկական կենտրոնում ներդրվել է կառավարման համակարգչային ցանց, ինչը
հնարավորություն է տալիս իրականացնել տեղեկատվության արագ փոխանակում բաժինների և
բաժանմունքների միջև: Բացի այդ՝ բժշկագիտության գծով տեղեկատվական դաշտի ընդլայնման
համար կառավարման համակարգչային ցանցում ներդրվում է նաև ինտերնետային ցանց:
Քանաքեռ-Զեյթուն ԲԿ-ն
2003թ-ից ղեկավարում է տնօրեն Գագիկ
Ստամբոլցյանը:
|